近期成日都有報道話，港人移民台灣數字創新高；就算唔係即刻去移民，都似乎有一股市民、尤其中產想走人嘅氣氛瀰漫，原因無非係市民恐懼共產黨及梁振英治下嘅香港變樣，走得快好世界。花生友都四出八卦，阿爺唔驚越揸越緊、嚇走晒香港嘅本土人才咩？點知一問完就俾政界中人恥笑，話阿爺鬼唔望呢班親泛民嘅中產走晒，用新香港人建造新香港。
唔少建制派like純官
唔知大家有冇留意，日前喺北京出席兩會嘅新世界主席、全國政協常委鄭家純，講到香港一定要推行國民教育嘅時候，反問咗一句，如果有啲人唔相信國家，點解要留喺香港居住？言下之意都係叫香港市民，若然唔like大可以移民走人。
花生友聽聞，唔少建制派同樣有純官呢種諗法，圍埋討論開呢股移民熱潮時，通常都嗤之以鼻，普遍覺得若然睇香港唔順眼、有本事咪走囉，冇咗佢哋喺度嘈嘈閉仲好。有政界中人就同花生友話，「你估北京會驚香港人移民咩？你哋呢啲識嘢嘅人走晒，對佢嚟講仲好，香港仲易管」。
呢位政界中人仲話，換轉佢係阿爺，肯定會喺趁香港人自動棄權、滲入多啲內地人才來港變新香港人，「呢啲人肯定聽話，肯肯定唔會反國教、更肯肯肯定唔會有票唔要；加埋每日一百五十個單程證名額，香港會變成點？大家心照。香港人如果走晒，先至中咗阿爺計」。
花生友
